Wo waret mir scho?
Das war 2011
2010 - so wars
2009 - des war's!
Schee und luschdig war's und Spass hät's gmacht!
(für mehr Infos , einfach mal aufa Datum klicke)
Des Johr 2008 war wunderbar, denn es war an Haufa los und des megat mir :
| im Februar |
waret mir wieder traditionsgemäss am Fasnetsamschtig de 02. bei de Dorffasnet z’Durchhausa und des war wieder ein tolles Programm, aber net nur wegat is. Aber scho au a wengle.
am Fasnetzeischtig de 05. waret mir no widder beim Zunftmeischterempfang vu de Lupfahansele z’Durchhausa und hond den verschönerat, denn do häts emole an Haufa Politker und dia kinnat so a Verschönerung guat braucha, und wenn’s nur mir sind! S’war wieder richtig luschtig und sellan Landrat häts is versprocha, dass er sich a wengle um isre Kinder kümmeret, denn sei Parole a Weihnachta war jo „Kinder gehen uns alle an“. Aber bisher ischer no nia ufftaucht, zum is amole ebbes abnehma. Er ischt zwar Landrat, aber im richtiga Leba halt au bloss an Ma! |
im März |
do waret mir am 07. beim 50-er Fescht vu iserm Freund und Fän, dem Harald „Hatschi“ Bury. Also mir hond bisher immer gmont, er sei an Fän vu is, aber jetzt hät is ebber gsait, er hät bloss mol gsait, er fänd des guat, wenn mir net so a blöde Goscha hättet! Egal, es war a schees Fescht bei ihm, des hommer au net anders erwartet, denn wenn er eins ka, no isches Feschta! am 08. waret mir no uffam 140. Geburtstag und zwar i de „Linde“ in Oberflacht. Ja und wie goht so ebbes, 140 Johr werra? Ganz einfach, mr ischt zu zweit, mr ischt de gleiche Johrgang und dann au no mitnand verheirotet. No kammer zamma so a Fescht macha. Schee war’s bei de Lina und beim Gustav Schad, und wenn mr dia zwei so agucket, no braucht’s einem ko Angscht werra, wemmar a klei wengle älter wurd! außerdem waret mir in d Schwäbische Zeitung. Klicket mol hier: |
im April |
des war de Wahnsinnsmonat. Am 05. April waret mir bei sellara Irmi Freudenreich vu Seitinga-Oberflaat, aber gfeschtet hät sie i de „Blume“ in Hausen o.V. und mr moss saga, sie hät a wunderschee Fescht ket. Kon Mensch siaht dera Frau a, dass sie schon fuffzgi worra ischt, also mir waret hin und weg! Sie ischt luschtig und guat druff und ischt jetzt iser grosses Vorbild! am 14. April waret mir bei de Generalversammlung vu de Volksbank Donau-Neckar in Immendingen, jo und obwohl dia Leit vorher sich hond furztrockene Zahla ahöra messa, waret sie hinterher no guat druff und mir hond an wunderscheena Ufftritt ket. Sogar de Bankchef, der Herr Baumann, hät Spässle mitgmacht und wenn mr jemols an Millionakredit brauchet, no beantragat mir den bei ihm, sell ischt sicher! und am 16. April waret mir dann no in Seitingen-Oberflacht, dert war no au a Generalversammlung vu sellara Bank und au dert war’s schee. Und dert hät de Bankchef Leibinger sin freia Obend opfera messa, und au er war luschtig und hät isre Spässle mitgmacht. Und falls mol iser Konto überlauft (mit sellna Milliona vum Herr Baumann), no leget mir des Geld beim Herr Leibinger a! Und jetzt no an Extragruass a die attraktive und nette Frau Wenzler vu Frittlinga! Mir hoffet, sie hät keins uff de Deckel kriagt, weil sie is bucht hät! Und am 17. April, do waret mir no bei isera Mitschweschter Betty Ziebel beim 40-er iglada und selbschtverständlich hond mir ihra au an Ufftritt naglegt, den sie so schnell net vergessa wird. Es war a tolls Fescht bei iserm Stehle Gerhard, und dia Betty Ziebel ka jetzt beruhigt uffs 50-er Fescht anischaffa! s’Meischt häts! ha ha ha … |
im Mai |
do hommer am 03. i de Halle in Gunninga dem Jochen Arno sin 50. Geburtstag verschöneret. Zumindescht bildet mir is des mol i! Der Jochen Arno ischt jo de ehemalige Schultes vu Gunninga und jetzt de Schultes vu Rietheim-Weilheim und sei Frau dia Ute hät gmont, wa ihm jetzt zu sim Glück no fehla dät, des seiet fünf Weiber wie mir! Es war richtig schee, vor ällem häts au no ebbes Guats zum Essa gea und zum Drinka, ja und dodermit ka mr is jo immer a Freid macha!
|
| im Juni |
do waret mir am 21. im Bürgerhaus in Denkingen. Und des war wirklich wunderschee. Dia Leit waret guat druff, die Stimmung war klasse und es hät selbergmachte Mauldascha geba und an guata Wein. Uff des Bürgerhaus kinnat dia Denkinger aber au wirklich stolz sei! Es war an rundum scheena Obend, au für uns! Dia Denkinger sind a luschtigs Völkle und do dätet mir jederzeit wieder naganga! De Schultes, de Rudolf Wuhrer, hät halt a wengle sei Fett vu is abkriegt, aber do ischer selber schuld, wieso isch er au so mager? |
| im September |
do waret mir am 26. sogar über d’Kreisgrenza naus und zwar in Saverwang, des ischt bei Ellwanga. Sellan Josef Borst ischt 50 worra. Und des war ein tolles Fescht. Und mir hond sogar dert übernachta dirfa. Und beide Seita hond beschlossa, dass mr sich uff äll Fäll wiedersiaht.
|
| im Oktober |
do waret mir am 17. beim Kulturförderverein in Hausen im Tal bei Beuron. Des war an richtig scheena Obend! Des Donautal ischt jo au wunderschee und dia Leit dert sind so ebbes vu nett, sell moss mr saga.
Zeitungsbericht
jo und am 31. Oktober und am 02. November häts jo „Ma(h)lZeit Mauldäschle!“ gheissa, gucket halt isere Bilder a, no wisset Ihr Bescheid! Zeitungsbericht |
| im November |
do waret mir am 21. und am 23. im Museum z’Seitinga-Oberflacht. Aber mir waret dert nit ausgstellt, wa denkt Ihr, sooo alt simmer no doch wieder net. Nei mir hond dert au an eigena Obend gmacht, und des war wirklich ganz toll. Des Museum ischt wia gmacht für is und mir kummet sicher wieder amole, wenn mr is gäret. Und der Schultes de Herr Flädle, also dia andera saget Herr Flad, ischt an netta Kerle und sin ganza Arbeitskreis an netta Haufa! Machet weiter so!
|
| im Dezember |
waret mir am 12. bei de Weihnachtsfeier vu de Firma Acument in Dürbheim.
Es war recht luschdig und mir hond anschliessend no feschte essa und drinka dirfa, und sell ischt jo emol scho wichtig für uns! A Dankschee an dFrau Bader, wo is bucht hät. Und eine Bitte hommer noch: Sind weidderhin nett zu isera Ommma!
|
Also 2007 waret mir...
| im Januar | bei de 40-Johr Feier vum Ralf Bertsche z’Durchhausa, und ihm häts gfalla, hät er zumindescht behauptet!
|
im Februar |
am Schmotziga Dunnschtig waret mir wieder bei iserna Narrafreunde aus Oaxa (Aixheim), jo und dert war’s halt wieder schee, wirklich wohr! Dia sind aber au echt nett! Am Fasnetsamschtig waret mir z’Durchhausa bei de Dorffasnet, ha und au dert war’s schee, ischt doch klar! Am Fasnetzeitschtigmorga waret mir beim Zunftmeischtempfang z’Durchhausa – oje, dert häts no wieder an Haufa Großkopfeta ket… aber s’häts mitana dau, sie hond sich benomma! |
im März |
am 09. waret mir bei de Gartafreund z’Aldinga, dert war’s soweit au schee, nur hond mr wengle hungra messa! Dafür waret mir am 17. in Wilflinga beim Albverein, und dert häts an Haufa zum Essa gea und nett waret sie, also es war echt an tolla Obend! Ja und danoch sind mir no zu de Jutta Spitznagel gi Seitinga, dia hät an runda Geburtstag ket, ha und dia hät sich so guat ghalta! Und des obwohl sie so an aschtrengenda Ma und zwei aschtrengenda Buba hät! |
im Mai |
waret mir am 11. bei de 60-Johr-Feier vu de Buschle Margot vu Stetta, dia hät des gfeiert in Mühlheim, ja und de MdL Fritz Buschle, der hät des igfädelt, und es hät sogar klappt, obwohl er jo an Politiker ischt! Und des war schee bei dena Leit, wirklich wohr! |
im Juli |
waret mir am 14. beim Johrgangstreffa z'Seitinga-Oberflaat und des war a schees Fescht, sell mommer saga, lauter runde Leit, halt Leit, wo an runda Geburtstag ket hond. Mir mond saga, in Seitinga-Oberflaat gfällts is einfach, do gammer immer wieder gern ani. Jo und am 22. ischt jo der Geburtstag vum Fanfarazug Durchhausa gfeiert worra, ha des war ein klasse Fescht, so an Haufa schöne Fanfarazügler waret do! Und jetzt denket au, jetzt hät der Fanfarazug Durchhaust ageba wie nur ebbes, dass sie a Vierteljohrhundert alt worra sind, dabei geits dia doch erscht seit 25 Johr! |
im August |
do waret mir am 09. beim 50-er Fescht vu sellam Reiner Merz i de Halle z'Durchhausa, ha und do war eine super Stimmung. Au wegat is. Glaubet mir zumindescht. Und sellam Reiner hät's au gfalla und er hät de ganze Obend gstrahlt wia so an Epfelbutza. Reat hät er! Dem gohts jo au blendend! Und no hond mir no a Premiere ket: mir hond zamma mit dena Buaba vu de White Eagle a Mädlei gsunda, also ko Bublei, weil mir sind jo Mädle. Ha und des war schee!
am 23. waret mir beim 60-er Fescht vu sellara Schlosser Eugenie im Lamm z'Weila. Und eins mommer jetzt amole saga: des war echt on vu de ällerscheenschta Ufftritt. A so tolle Stimmung war des, nette Leit, au wenn Verwandte vu de Frau Schmelzle und de Frau Ziebel drunter waret, egal, des hätt de Stimmung kon Abbruch dau! Und mir hond Sacha erfahra, zum Beispiel hond Frau Schmelzle und Frau Ziebel dia gleicha Verwandta, komisch oder? am 30. und 31. hond mir zwei Intensivprobedag gmacht am Bodasee uffam Kämbingplatz vu Horn. Des war vielleicht luschtig. Um uns rum ischt de Platz älleweil leerer worra, komisch oder? Mr moss fescht a sich glauba, dass des älles reat ischt, wa mr macht, no ka einem des au net schocka, wenn dLeit reihaweis davulaufa! Mir berichtet a anderer Schtelle mol no dodervu! |
| im September | do waret mir am 15. beim 60-er Geburtstag vu sellam Gerhard Haas in Mühlheim. Der hät i de Linde-Hochwacht gfeiert, und sei Frau Ulrike und sei Schwägerin Brunhilde, dia hond gmont, des sei a guate Idee, wenn sie is buchet. War au a guate Idee! Des war schee und mir hond hinterher sogar no a super Schnitzel kriagt! Mit Salat! |
| im Oktober |
do waret mir bei unserem geschätzta (mir schätzet ihn uff gefühlte 42) Herrn Landrat Guido Wolf zum Kaffeetrinka. Ja dem ischt nix anderes übrig blieba, denn er hät mol leichtsinngerweise gsait, er lädt uns ein. Des sait mr zu uns net ugstroft! Aber es war richtig nett und er hät au sin Stellvertreter de Herr Helbig iglada und no de Sozialminister de Herr Mager und dann no an echta Doktor, de Doktor Schuster, also mir sind zwar scho älter, aber so dass jedes Mol scho an Doktor dabei sei muss, so alt simmer no doch widder net! Mrwoissnowohlau. A Beweisfoto hommer übrigens au, klicket einfach do druff. Der i de Mitte ischt übrigens de Landrat.
|
im November |
waret mir am 17. uff de Weihnachtsfeier vu sellara Firma Eberle-Hald. Des war uffam Karpfa und mir kinnat Eich saga, mir sind behandelt worra wia echte Gräfinna von und zu! Mir hond ein Viergangmenü kriagt vum Feinschta, und au de Ufftritt hät trotz vollem Maga guat klappt und hinterher hät mr no wengle a de Bar ebbes trunka. Und ganz toll war, dass is isern Raudie Hans abgholat hät i de Nacht, solche Manna braucht die Welt. am 24. waret mir wohl wieder i dem schöna Seitinga-Oberflacht und zwar beim Herbtfescht vum Albverein. Dia hond im „Adler“ z’Oberflaat gfeiert und es war wunderbar. Nocham Ufftritt hond mir glei no isri Weihnachtsfeier gemacht und des war gschickt, denn der Albverein hät is eine Runde noch de andera zahlt und au no de Salat, dert allerdings bloss eine Runde. Ha wa wellat mir au mehr? Is gohts doch älleweil so guat. A dickes Lob a de Albverein, a dia Petra und ihran Josef und au wieder a de Papa Hans, der is i de Nacht um halbe viere no heimgfahra hät. |
im Dezember |
war am 02. dia Schultes-Wahl z’Durchhausa. Und obwohl kon Gegakandidat do war und au kon Mitbewerber und au kon Konkurrent, hät der Erwin Link-Peterle dia Wahl bravurös gwonna! Mir hond is des natürlich net nemma lau und hond ihm a Ständerle gsunga und ihm feschte gratuliert! Mir freiet is uff weitere acht Johr fruchtbare und liebevolle Zusammaarbeit. do dirfet mir am sunntig de 09. zum Johrgang 39/40 gi Trossinga, dia hond do a Adventsfescht, ha und des mitta im Dezember, do sind mr mol gspannt, weil do waret mir jo no nia, aber sellan, wodes buacht hät, scheint scho mol an luschtiga Ma zu sei, no werrat sini Johrgangskamerada au Humor hau! am zweita Adventssunntig waret mir beim Johrgang 39/40 zTrossinga, dia hond Adventsfeier gmacht, wa soll mr au suscht macha im Advent? Uff äll Fäll wars an netta Middag und au zTrossinga kinnat sie lacha (wer hät denn was anderes behauptet hä?) |
Also 2006 waret mir...
| im Feber | - am Bunta Obend z’Dalle - am Schmotziga Dunschtig z’Oaxa - am Fasnetsamschtig bei de Dorffasnet z’Durchhausa - am Fasnetzeischtig beim Zunftmeischterempfang z’Durchhausa |
im März |
- bei de 60-Johr-Feier vum Schlosser Hans z’Durchhausa |
im April |
- beim Senioramittag z’Seitinga-Oberflaat |
im Mai |
- beim Frühlingsfescht vu de AMSEL-Gruppe z’Schwenninga |
im Juni |
- bei de 70-Johr-Feier vum Jupp Schorpp im Adler z’Oberflaat - bei de 50-Johr-Feier vum Werner Kefer z’Seitinga-Oberflaat |
im Juli |
- bei de 120-Johr-Feier vu de Gisela und vum Norbert Martin z’Möhringa - i de Hozigkirch vu de Dagmar und am Alexander Merz z’Seitinga |
im Auguscht |
- beim Galaabend bei de 100-Johr-Feier vum Sportverei Durchhausa - bei de Talentsuche im Freilichtmuseum z’Neihausa |
im Oktober |
- bei de 70-Johr-Feier vu de Renate Königsmark im Adler z’Oberflaat - bei de 30-Johr-Feier vu de Gertrud Schlecht z’Durchhausa |
im November |
- bei de 40-Johr-Feier vu de Frau Peterle z’Durchhausa |
im Dezember |
- beim Senioramittag z’Welladinga |