Frau Sössle

Des ischt isri Sonja Sössle.

Manche kennat sie au unter Sonja Schneckenburger.


Sie ischt eindeutig die Musikalischte bei de Mauldäschle und ka au als einzige d’Nota lesa, und zwar nit nur d’Schulnota i de Zeugnis vu ihrana Kind. Sie duad dia Liader ischtudiera,und des ischt emol net so einfach, weil’s jo dreistimmig oder sogar vierstimmig wera soll und schee doa sotts au no! Dass sie dia Oma vu de Mauldäschle ischt, behauptet sie selber und drum derf mrs au überall verzella.

Wenn de Frau Sössle ihrene hochwertiga Knie emol a wengle zitterat, no leit des net a de Uffregung oder anera rätselhafta Krankheit, sondern am wackliga Bühnaboda. Aber sobald mir mol zNju Jork sind, wurds besser, selli werat jo an gscheita Bühnaboda hau!

Ihra schlimmschtes Erlebnis mit de Mauldäschle war bisher,
wo sie beima Ufftritt ihra sauteires Haitechinstrument
(a Iweckglas) mitama Korkazieher zammagschlaga hät
und de ganz Saal tobt hät.
Sie hät seither a Abneigung gegat Glas
und trinkt ihra Bier jetzt emol direkt aus de Flascha und ikocha duat sie au nit meh!


Und jetzt no an kleine Steckbrief, damit Ihr wissat,
wa Ihr de Frau Sössle Guates doa kinnat (also schenka), falls Ihr sie mol sehat!

Lieblingsessa:	Linsa und Schpätzle
Lieblingstrinka	Bier
Lieblingskrach:	Tschon Bontschovi oder alti Schlager
Lieblingsbloama:	Badengele
Lieblingsgschmäckle:	älles, Hauptsach net so siass
Lieblingsurlaubsort:	Daheim uff da Terrass
Lieblingsgschenk:	guate luschtige Gäscht