Frau Schmelzle

Des ischt isri Heike Schmelzle.

Sie losset aber au, wenn mr ganz laut Heike Merz riaft!

Sie ischt meischtens guat glaunt, ausser wenn sie grad nix essa darf, und momentan beschäftigt sie schwer den Seitinger-Oberflachter Schultes, de Herr Flädle, denn sie will's no verleba, dass in Seitinga-Oberflacht de Kindergarta an Preis gwinnt! Do schafft sie wia bleed und nebather verkauft sie no fleissig Weckle a älle ihre Fäs.

Trotzdem hät sie no Zeit für ihre Mauldäschle und ischt mit Begeischterung dabei. Sie goht leidaschaftlich gärn gi Walka (sprich: Walka) und isst hinterher immer a Pärle Brotwirscht mit Gsälzbrot - aber ohne scharfem Senf
und ohne schlechtem Gwissa, denn sie sait immer
„Wenn i net zum Walka gau dät, dät is jo trotzdem essa und sell wär viel schlimmer.“


Sie moss bei de Mauldäschle-Ufftritt immer a wengle des Dummerle macha, und des macht sie richtig guat, aber eins moss mr jetzt au mol saga: Nur a Gscheite ka a Dumma schpiela, umkehrt gengt sell net! Verschtanda?

Als einziges Mauldäschle hät sie drei schlimmschde Erlebnis: Und zwar des eine war, wo sie vuma Auslandsufftritt z’Oaxa (also Aixheim) heimgfahra ischt und dodrbei de Auspuff am Auto verlora hät. Sie ischt aber hinterher glei weitergfahra - sie hät einfach s’Autoradio a weng lauter gstellt, praktisch wie sie ischt! Des zweite schlimmschde Erlebnis ischd des: und zwar war mol a Bild vuma Ufftritt i de Zeitung und do schtoht d’Frau Schmelzle mit hoch erhobana ärm do und hät Riesaschweissfleck unter de Achsla, des hät mr sogar i de Zeitung deutlich gsäha… aber sie hät behauptet do häb ebber beim Speckessa d’Finger a de Zeitung abputzt... und des dritte schlimmschde Erlebnis war, wo mir isere tolle Obende ket hond z'Durchhausa, do hät sie Kommando geba messa, auf die Plätze, fertig, los... und no häts iser Schmelzle so anigschlaga uff ihra Fidla, o jeh, d'Leit hond sich nimma kriegt, und mir hond scho denkt, jetzt mommer zu viert weitermacha, aber iser Schmelzle ischd vum Boda uffgjucket wia eine Rakete, sensationell!

Und jetzt no an kleine Steckbrief, damit Ihr wissat, wa Ihr de Frau Schmelzle Guates doa kinnat (also schenka), falls Ihr sie mol sehat!

Lieblingsessa:	älles, Hauptsach s`schmeckt
Lieblingstrinka:	Kai`s pinja
Lieblingskrach:	Sasha weil den hät sie schomol laif gsehne
Lieblingsbloama:	Margritte (wenn se nu nit so stinke dätet)
Lieblingsgschmäckle:	Wenn d´Mame Kuche backt
Lieblingsurlaubsort:	Südsee, sie war bloss no nie det und woiss au net, wo des leit
Lieblingsgschenk:	älles, wenns reat fill koscht