08. Februar 60. Geburtstag Rita Sauter, Trossingen, in der "Blume" in Hausen o.V.

Also des war a wunderscheenes Fescht, wo dia Rita Sauter do ket hät. Des ischt übrigens dia Wirtin vu de Caféteria in Trossingen im ehemaliga Dr.Karl-Hohner-Heim. Und dia hät sich so gfreit, dass mir kumma sind, dass mir is au gfreit hond! Bucht hät is dia Blumawirtin, des ischt au a Freundin vu de Rita, und a dem Obend hand mir feststella kinna, dass dia Blumawirtin net nur a supertolle Wirtin ischt sondern au a guate Schauspielerin. Und der Ma vu de Frau Sauter, also de Herr Sauter sozusaga, der hät aber älles gea für sei Frau! Der hät doch tatsächlich sich als erotische Dame verkleidet und zu de "Glocken von Rom" gsunga begleitet vu vier tolla Manna vu de Narrazunft vu Trossinga! Mir sind ganz neidisch worra. Des moss Liebe sei! d'Frau Peterle häts ihrem Ma no daheim verzellt, er hät glei gsait, sie soll sich koni Hoffnunga macha, des macht er a ihrem 60. Geburtstag sicher net. Mir danket de Blumawirtin für die tolle Bewirtung, es war so schee, das mir fascht no die letzta Gäschte waret. Und de Rita Sauter wünschet mir einfach, dass sie weiterhin so umawusela ka wia bisher.