Madame Brué

Des ischt isri Brigitt Brué
(schwäbisch: Brischitt Briaaah).

Sie ischt vor langer Zeit als Birgit Mauch uff d'Welt kumma.


Sie ischt de französische Importschlager bei de Mauldäschle und zwar deshalb, weil sie mol an Kuss kriagt hät vuma französischa Mund, danoch kamet aber nur no schwäbische Goscha. Sie ischt bewegungstechnisch die Begabteschte und dät mit de Mauldäschle gärn viel mehr Choreographie mache, aber neamer woiss, wo genau des leit und no lot mrs halt emol bleiba. Aber sie gibt net uff und behauptet au weiter tapfer, dass sie als einzige emol sofort de Ton und d’Melodie hät. Dass sie dodafür stellaweise emol an andera Text singt, vu sellam will sie nit wissa! Au dass sie innerhalb kürzeschter Zeit zwei hochwertige Instrumente gschrottet hät, sell verdrängt sie einfach.

Ihra schlimmschtes Erlebnis mit de Mauldäschle war bisher, wo sie voram Ufftritt no hät bis drana schaffa messa und no in einer Hektik heimgfahra ischt, um gschwind i ihra Mauldäschle-Koschtüm zu schlüpfa, no ischt ira so an bleeda Huatträger mitema ghäkelta Klopapierrollabezug uff de Ablag in ira nagelneies Auto neigfahra, und des, wo sie zu ällam na au no ihra Sach keet hät und nix im Kiahlschrank und Zeit zum mit dem Ma goscha hät sie au nimma ket. Aber beim Ufftritt hät neamer ebbes gmerkt, sie ischt halt an echte Profi.

Und jetzt no an kleine Steckbrief, damit Ihr wissat,
wa Ihr de Madame Brué Guates doa kinnat (also schenka),
falls Ihr sie mol sehat!

Lieblingsessa:	Häppchen
Lieblingstrinka:	Weissherbscht
Lieblingskrach:	Katie Melua
Lieblingsbloama:	Sonnebloama
Lieblingsgschmäckle:	Gotte Klaras Kochdüfte
Lieblingsurlaubsort:	Griecheland
Lieblingsgschenk:	Männerbackform